Sueñu que ye vida

 

 

SUEÑU QUE YE VIDA

 

Autor : Félix Pío de Aramburu y Zuloaga 

(1848–1913)

 

                (Al Sr. Gumersindo Laverde Ruiz)

 

Pal que non tien sosiegu

Y aballa nes llabores

Desque Dios unvía el día

Fasta que vien la noche,

Paez el xergón, de fueya,

De plumes de palombes,

Pero entovía más blandu

Pa mozos ye y pa moces

Qu’al chase l’alma alcuentren

Enllena de perdones

De romeríes sin cuetes,

Sin gaites nin tambores,

¿Qué reina habrá endayuri

Que’l catre d’ella atope,

Anque lu encurumpine

Con llana o con pilote,

Más blandu, más mullíu

Qu’aquel xergón en onde

Espurri’l cuerpu Pina

Dempués de ver dos hores

Al mozu galantiante

Con el que ta en sos glories?

Sallando’l maizucu

Qu’ha dar panoyes roxes,

Quiciás porque al so pelu

Semeyen les panoyes,

Enteru coló’l día,

Y, ansina que foi noche

Pintó Llope en so casa

Y al pie del llar sentóse.

El gozu de la neña

Al velu non se esconde,

Que lluz sal pelos gueyos

Y pela cara en roses.

Los vieyos, nutru escaño,

Esclúquenlos y emboben,

Falen algo, empapiellen,

Callen, pigazen, ronquen…

Entrambos, Llope y Pina,

A cuentu traen cien coples,

Marmullen polo baxo,

Riyendo faen que roñen,

Embúrriense, y con plizcos

Aforren les razones.

El mozu col so palu

Fai mil ribilicoques

Ena ceniza; y ella

Pa non tener ucioses

Les manes, un tarucu

Esbilla, menia’l pote,

Inflando los papinos

Asopla, los tizones

Compón, y si ye’l casu,

Faltando–y otres coses,

Col mandilucu enrieda

Que va encoyendo en llorcies.

Dacuando blinca’l gatu

Llambión, enriba pónse–y;

Y si ella lu afalaga,

También el mozu entóncenes

Fai esbarriar pel llombu

Sos manes pecaores.

El gatu entiesa’l rabu,

Miaga les gracies, dóblase,

Fasta que diz la neña

(Al gatu non, al home

Que ta mirando en tientes…)

—“¡Cuidao non t’enquivoques?”

El tiempu cuerre; el mozu

Andando a trompicones,

Pos pa marchar les pates

Alcuentra perezoses,

Camín va de la puerte

Y aspera qu’allí emboque

col so candil la neña

Que ye sol de los soles.

Acasu ella lu ameche,

Acasu saín–y sobre,

Acasu coles manes

Tamién ella lu arrodie;

Pero’l candil acasu

Al viento–y diz que asople,

O él solu acasu apágase

O apágalu el demontres.

Lo cierto ye qu’a escures,

Sin lluz y hasta ensin mosques,

—“Adiós”, diz Llope a Pina,

Y “adiós”, diz Pina a Llope

 

. . . . . . . . . . . . . . . . . . . . . . . .

 

La neña va pal cuartu

Y al ventanucu asómase…

¡Qu’azuliquín el cielu,

Qué guapu’l valle, el monte!

La lluna enriba atendi,

Abaxo’l ruidu óyese

Que sobre los guixarros

De Llope faen les broques…

La neña zarramica

Anque en mirar s’enfote,

Y, ensin querer, de sueñu

La cabecina dóblase–y…

Yá entorna la ventana,

Yá queda Pina a soles,

Yá con entrambes manes

Que lleva’l cocorote,

(Mientres el senu alzáu

Más fachendosu ponse),

Desata los corales

Qu’al piscuecín s’enrosquen;

Yá… pero abasta, abasta,

Pos tantes relaciones

Son pa naguar la cuenta

Y al más pintáu amorien.

Dirévos qu’en un verbo

La neña desvistióse

Y, mientres marmullaba

Dalgunos paternostres,

Con ixuxús el mozu

Arroxidando lloñe,

La devoción acasu

Quitába–y a la probe.

Dirévos qu’al echase

La neña sonriyóse;

Qu’en menos d’un menutu

El sueñu entró–y de golpe,

Y aquella sonrisina,

Sin esnalar como otres,

Quedóse enriba’l ñeru

De perles y amapoles.

 

 

…………………………………………..

Anuncios
Esta entrada fue publicada en Poemes en asturiano. Guarda el enlace permanente.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s