NORAGÜENA

 

 

 

 

NORAGÜENA

 

 

 

 Autor: Ángel García Peláez

(“Ángel de la Moría”) (1858–1895)

           

 

A E1 Oriente de Asturias

 

¡Bien haya, rapaz, to nombre!

¡Bien haya, nino, la madre

Que te parió y a sos tetas

Quitóte la primer jambre!

Gaceta del mio llugar,

Campana del mio llinaxe,

Papelín d’espliegu, dime,

¿Quién te llevó a bautizate

Con ropón cuayáu de cintas,

Marmota llena d’encaxes

Entre mantiellos de seda

Con aguyetas d’estambre?

¿Fo’l to bautizu solemne?

¿Hebo nél cruz y ciriales?

¿Quiés te posieren el nombre?

¿Quiés el credo te rezaren?

¡Bien haya, rapaz, la hora

En que te parió to madre!

¡Bien haya, nino, la villa

Que recudió tos pañales!

 

              …..

 

Ven, periodiquín hermosu,

A cuntanos los afanes

D’esa perlla que jallada

De los Tazones en Sable

Hoi se conoz en el mundiu

Col pelativu de Llanes.

De parllanos d’esi ñeru

Tos lletras nunca abocanen;

Pórtate como quien eres

Agora que ya trunfasti

Pa que tou el que te vea

Pueda dicir al istante

Qu’eres astur y en tos venas

Cercula llanisca sangre.

Yo, anque escasu de saber,

Podiera conseyos date,

Que no se sabe por diañu

Lo que por vieyu se sabe;

Pero temo que, al jacelo,

Podiera algunu tachame

Y por eso solu vó,

Rapacín, a soplicate.

 

              …..

 

   Trainos, por Dios, cuando vengas

A aportar a estos llugares,

Engüeltos en tos dobleces

D’esos regatos los ayes,

Los sones de las campanas,

Los escuchos de los llares,

El rutir de los cachones

En la llastra al estrellase,

De las juentes los bulleros,

Los murmullos de los árboles,

Del xilguerín y el miruellu

Los cánticos celestiales,

El runcir del saltapraos

Y del grillu el son constante,

Y, en fin, los ecos de todo,

Que hai aquí quien se rellame

Cuando–y jablan de la tierra

En so nativu llinguaxe.

Párllanos tamién, morenu,

De l’Iglesia y sos altares:

Dinos cuándo la novena,

De los Dolores se cante,

Cuándo empieza el Miserere

Y cuándo entonan la salve;

Si canta tovía Marcelo

Con so vozona de chantre

Qu’igual no tevo na Villa

Ni tampocu n’otra parte,

Pos de todas estas cosas

Son nuestros recuerdos tales,

Que’l corazón en el pechu

Gozosu al oírlas llate.

Dinos si van a la mar

Las lanchas y lo que traen;

Si están las añadas güenas,

Si no cabe en los llagares

La sidre, si las panoyas

Sálense de los disvanes.

Párllanos del Samartín

Y l’escapulla con arte;

Dinos algo del mercáu,

Si hay muncha xente na calle,

A cómo val la mantega,

Si el quesu é de güena clase,

Cuántu val el de Porrúa

Y a cómo está’l de Cabrales;

Qué piden pol celemín

De jabas, a cómo valen

Los prunos y las cerezas

Y si se venden por pares

Entovía las ablanas

Y el tocín val a dos riales.

Cúntanos si va la xente

A la Vega a solazase,

Y, cuando al son zalameru

Del tambor haya quien baile

Un pericote llaniscu,

Únvianos en p’acá un ¡Válame!

Y al mesmu son bailaremos

Lo mesmu chicos que grandes,

Qu hai aquí vieyos, mui vieyos,

Que no son con so badaxe

Y pa char un ¡ijujú!

No hai tovía quien yos gane.

Asina mesmu te pido

Que de las fiestas nos parlles,

Con sos majos pelegrinos,

Con sos llogos y xigantes

Con sos ramos y jogueras,

So salea y sos cantares.

No se t’olvide, tampocu,

El decinos lo que jacen

La xente d’Ayuntamientu

Con sos escribas y alcaldes;

Y repréndilos, morenu,

Cuando quieran apartase

Del camín que seguir debe

Quien de gobiernar s’encargue.

Sé mayuelu d’apellique

Qu’en arpeyos sin iguales

Lleve pal mundiu los sones

D’esas llosinas sin pares;

Y si lo jaces así,

Fasta una oreya apostare

A que tendrás más veceros,

Como premiu a tos afanes,

Que puntadas en so vida

Tien dadas Xuanín el sastre;

Que han de sobrate lletores

Que te veneren y ensalcen,

Quienes, a un impulsu mismu

Y a una misma voz, unánimes

Bendeciremos to nombre,

Besaremos tos carates

Y más y más cada día

Nuestru amor será más grande

A medida que a to jueu

Nuestru corazón s’inflame.

 

                                    México, Abril de 1885

Anuncios
Esta entrada fue publicada en Poemes en asturiano. Guarda el enlace permanente.

Una respuesta a NORAGÜENA

  1. mimosina dijo:

    Hola mi reinaaa: digo yo, que el Oriente de Asturias, ye como el Hola. Era, el lazo de conexion entre Asturias y las Américas.Los "ecos de sociedad" de antaño y de haz cuatro días.
    Bueno fía,toi muy plof ultimamente.Muy baja, desanimada,no se muy tonta. Menos mal que será pasajero y dentro unos dias no me acuerde de estos ultimos. En  fin mi niña,muchisimos besinos de esta mona que te quier.Muuuuuuakkkkkkkkkkk

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s